Stærsti sjávarútvegsvefur landsins sjósettur

Nýjum sjávarútvegsvef mbl.is sem nefnist 200 mílur var hleypt af stokkunum í dag. 200 mílur er alhliða frétta- og upplýsingaveita um allt sem tengist sjávarútvegi.

Nýlega festi mbl.is kaup á fremsta sjávarútvegsvef landsins, sax.is. Allar upplýsingar sem hafa fram til þessa verið aðgengilegar á sax.is verða því hér eftir aðgengilegar á 200 mílum á mbl.is.

Auk fréttaflutnings og umfjöllunar um málefni tengd sjávarútvegi er að finna á vefnum nýjustu upplýsingar um afurðaverð, gengisþróun og olíuverð, skipa- og útgerðaskrá,  hafnarskrá, kvótatölur, staðsetningu skipa og margt fleira tengt sjávarútvegi. Þá er þar  einnig að finna þjónustuskrá fyrir aðila í sjávarútvegi auk tenglasafns fyrir innlenda sem erlenda vefi sem fjalla um sjávarútveg.

Vefurinn var formlega sjósettur með pompi og prakt á opnunardegi alþjóðlegu sýningarinnar Sjávarútvegur 2016 / Fish Expo 2016 í dag, miðvikudaginn 28 september kl. 17. 

Umsjónarmaður 200 mílna er Þorvaldur B. Arnarsson.

• Blogga um frétt