Kerecis færir út kvíarnar

Kerecis Omega3 Wound, sem framleitt er af íslenska lækningavörufyrirtækinu Kerecis til meðferðar á vefjaskaða, hefur verið samþykkt til endurgreiðslu í bandaríska almannatryggingakerfinu Medicare í 45 af 50 fylkjum Bandaríkjanna.

Nýlega bættust fylkin Connecticut, Illinois, Maine, Massachusetts, Minnesota, New Hampshire, New York, Rhode Island, Vermont og Wisconsin við þau 35 fylki sem þegar höfðu samþykkt vöruna til endurgreiðslu úr almannatryggingakerfinu þar ytra.

Kerecis Omega3 er affrumað fiskiroð sem er ríkt af náttúrulegum fjölómettuðum Omega-3 fitusýrum. Rannsóknir hafa sýnt að varan flýtir gróanda og stuðlar að endunýjun á vefjaskaða. Þegar varan er lögð á svæði sem orðið hefur fyrir vefjaskaða, svo sem sykursýkissár, hefja frumurnar uppbyggingu á nýjum líkamsvef. Efnið var framleitt í samstarfi við Rannsóknamiðstöð bandaríska sjóhersins og Sárarannsóknarsetur bandaríska landhersins og hefur gefið góða raun við að græða þrálát sár.

„Þetta færir okkur skrefinu nær takmarki okkar um endurgreiðslu til sjúklinga úr almannatryggingakerfi Medicare á landsvísu,“ segir Chris Harte, framkvæmdastjóri Kerecis í N-Ameríku. „Við hófum virka markaðssetningu á árinu og erum virkilega ánægð að sjá jákvæð áhrif vörunnar á þá sem þjást af langvinnum og erfið sárum.“

Tengt efni: Umbreyta fiskroði í lækningavöru

• Blogga um frétt