Sýningin Sjávarútvegur 2016 / Iceland Fishing Expo 2016 hófst í gær í Laugardalshöll. Það var Gunnar Bragi Sveinsson sjávarútvegsráðherra sem opnaði sýninguna formlega að viðstöddum forseta Íslands, Guðna Th. Jóhannessyni, og fleiri gestum.
„Þarna er til dæmis verið að kynna nýjar vélar sem eru fremstar í heiminum varðandi roðflettingar og flökun sem eiga eftir að breyta vinnslu á fiski,“ segir Ólafur M. Jóhannesson, framkvæmdastjóri sýningarinnar, en það eru um 120 innlendir og erlendir aðilar sem taka þátt í sýningunni og verða margar nýjungar sem tengjast sjávarútvegi kynntar. Þegar Morgunblaðið náði tali af Ólafi hafði hann nýlokið við að fylgja hópi gesta um sýninguna og sagði þá nær orðlausa yfir því sem þar bar fyrir augu.
Forsetafrúin veitti Einari Lárussyni, Hilmari Snorrasyni, Óðni Gestssyni, Karli Sveinssyni, Friðjólfi Sævarssyni og Axeli Helgasyni viðurkenningar.
mbl.is/Eggert Jóhannesson
Í opnunarathöfn sýningarinnar í gær voru einnig veittar viðurkenningar til þeirra sem þykja hafa skarað fram úr í greininni að mati helstu samtaka í íslenskum sjávarútvegi en Eliza Reid forsetafrú veitti viðurkenningarnar.
Axel Helgason hlaut viðurkenningu Landssambands smábátaeigenda sem trillukarl ársins. Fiskvinnslan Íslandssaga á Suðureyri hlaut viðurkenningu Samtaka fyrirtækja í sjávarútvegi og Slysavarnarskóli sjómanna fékk viðurkenningu Sjómannasambands Íslands. Þá hlaut Einar Lárusson viðurkenningu Íslenska sjávarklasans. Fiskmarkaður Þórshafnar og útgerð Saxhamars SH 50 hlutu bæði viðurkenningu Samtaka fiskframleiðenda og útflytjenda.