„Hefur aldrei litið betur út“

Frystitogarinn Örfirisey RE-4 lagði nýverið í sína fyrstu veiðiferð á nýju kvótaári eftir allsherjaryfirhalningu. Skipið fór í slipp á Akureyri um miðjan ágústmánuð og lagði þaðan úr höfn mánuði síðar eftir að hafa undirgengist ýmiskonar lagfæringar og málningarvinnu.

Örfirisey RE-4 er 28 ára gamall skuttogari sem smíðaður var í Kristiansund í Noregi og gerður er út af HB Granda. Skipstjóri á skipinu er Símon Jónsson.

„Það er allt annað að sjá hana eftir sminkunina. Þessi drottning úthafanna hefur aldrei litið betur út,“ eins og Arinbjörn Marinósson, sem var háseti á fleyinu til fjölda ára, komst að orði.

Héldu skipverjar við svo búið brosandi og bjartsýnir inn í nýtt kvótaár.

Myndin er fengin af heimasíðu Þorgeirs Baldurssonar.

• Blogga um frétt