Makrílafli fari ekki yfir 1.021 þús. tonn

Í viðræðum Íslendinga, Norðmanna, Færeyinga, Grænlendinga og Evrópusambandsins í vikunni um makrílveiðar næsta árs hefur náðst niðurstaða um að miða við að afli fari ekki yfir 1.021 þúsund tonn árið 2017.

Íslensk stjórnvöld hafa hins vegar ekki tekið ákvörðun um kvóta Íslendinga á næsta ári. Samkomulag strandríkja um skiptingu liggur ekki fyrir frekar en áður, en fundinum lauk síðdegis í gær.

Fundurinn um makrílveiðar, stjórnun og skiptingu var haldinn í Clonakilty á Írlandi, en í næstu viku eru ráðgerðir fundir í London um veiðar á norsk-íslenskri síld og kolmunna. Evrópusambandið fer nú með formennsku í viðræðum um þrjá fyrrnefnda fiskstofna, en ekkert heildarsamkomulag er um stjórn þessara veiða.