Brotið blað í sögu Fisktækniskólans

Samningar sem tryggja rekstur Fisktækniskólans til ársins 2020 voru undirritaðir í vikunni. Skólameistari fagnar þessum áfanga og segir blað brotið í sögu skólans.

Síðastliðinn mánudag undirrituðu ráðherrarnir Illugi Gunnarsson og Bjarni Benendiktsson ásamt skólameistaranum Ólafi Jóni Arnbjörnssyni og Ólafi Þór Jóhannssyni, formanni stjórnar, þjónustusamning ríkisins við Fisktækniskóla Íslands í Grindavík.    

Samningurinn tekur til kennslu tveggja ára grunnnáms í fisktækni og gildir til fimm ára, eða til ársins 2020.

Ólafur segir að brotið hafi verið blað í sögu skólans við undirritun þessa samnings. Fisktækniskólinn hafi allt frá stofnun hans árið 2010 mátt sæta því að búa við skammtímasamninga með því óöryggi sem því fylgir, bæði hvað varðar rekstur og uppbyggingu. 

Sívaxandi vinsældir

Þrátt fyrir þessa óvissu hafi námið notið sívaxandi vinsælda undanfarið. Tæplega sextíu nemendur hafa lokið námi í fisktækni frá 2012 og vel á þriðja hundrað manns þegar starfandi í greininni hafa farið í raunfærnimat á grundvelli námskrár skólans. 

Nú stunda um 120 nemendur nám í fisktækni á fjórum stöðum á landinu. Um helmingur þeirra  stundar námið í Grindavík, en auk þess eru 12 nemendur á Sauðárkróki, 30 á Dalvík og 12 nemendur á Höfn.  

Að sögn Ólafs skólameistara hefur stefna skólans frá upphafi verið sú að auk Grindavíkur verði náminu komið á á sem flestum stærri útgerðarstöðum á landinu. Í undirbúningi sé nú að náminu verði komið á í Vestmannaeyjum í nánu samstarfi við heimamenn.     

Við undirritun þessa samnings eru nú 142 nemendur sem stunda nám á þeim námsbrautum sem Fisktækniskólinn hefur þróað.

Sérnám í fiskeldi

Auk grunnnáms í fisktækni, Marel-vinnslutækni og gæðastjórnun verður nú í fyrsta skipti boðið upp á sérnám í fiskeldi. Námið er skipulagt í samstarfi við Háskólann á Hólum og hefst kennsla í byrjun janúar 2017. Innritun á vorönn 2017 er nú hafin.

„Með þessum samningi sem nú hefur verið undirritaður má segja að skólanum sé endanlega skipað á bekk með öðrum starfsmenntaskólum á landinu. Samningurinn skapar grundvöll til enn frekari sóknar á þessu sviði og vænta má að um 200 nemendur stundi nám á þessum brautum á næstu árum,“ segir Ólafur Jón Arnbjörnsson. 

• Blogga um frétt