Gæti leitt til hruns á ferskfisksmarkaði

Á það er bent í vefmiðlinum Undercurrent News, sem segir viðskiptafréttir úr sjávarútvegi, að óttast sé að markaður með ferskfisk frá Íslandi muni hrynja, komi til verkfalls sjómanna á Íslandi 10. nóvember eins og boðað hefur verið.

Helstu markaðir með ferskan fisk eru í Bretlandi, Spáni og í Miðjarðarhafslöndum.

Í umfjöllun um mál þetta í Morgunblaðinu í dag segir Heiðrún Lind Marteinsdóttir, framkvæmdastjóri Samtaka fyrirtækja í sjávarútvegi, að heyrst hafi að kaupendur á ferskfiski hafi áhyggjur af þróuninni hér á landi. „Ferskfiskurinn fer á veitingastaði og í verslanir í Evrópu og þar eru auðvitað aðilar sem þurfa að reiða sig á trausta afhendingu á fisknum. Eðlilega hafa menn áhyggjur af því að geta ekki veitt viðskiptavinum sínum þær vörur sem þeir hafa verið að veita,“ segir Heiðrún.

Aðspurð segir hún það vissulega áhyggjuefni ef viðskiptalínur lokast af þessum sökum.