Marel gefur HVEST á Patreksfirði ungbarnavog

Marel gaf Heilbrigðisstofnun Vestfjarða á Patreksfirði ungbarnavog á dögunum, en Marel gefur nú vog á hverju ári í stað þess að senda út jólakort. Fara vogirnar þangað sem þeirra er mest þörf og varð HVEST fyrir valinu að þessu sinni.

Valdimar Gunnar Sigurðsson, svæðissölustjóri Marel á Íslandi, afhenti Önnu Árdísi Helgadóttur, hjúkrunarstjóra HVEST á Patreksfirði, vogina. Vogin er mjög nákvæm og á henni má bæði vigta og mæla lengd barnsins þannig að ekki þarf að flytja það á milli í mælingum. 

Auðveldar ungbarnaeftirlit
„Gjöfin er afar höfðingleg og vel metin,“ segir Anna Árdís Helgadóttir hjúkrunarstjóri. „Hún á eftir að koma að góðum notum og auðvelda okkur að fylgjast með þyngd ungbarna.“ Það á sérstaklega um fyrirbura, þar sem vogin er mun nákvæmari en þær sem hún leysir af hólmi. Nú er hægt að mjólkurvigta léttbura og fylgjast betur með ef eitthvað tefur þyngdaraukningu hjá ungbarni. Vogin auðveldar þennan þátt ungbarnaeftirlitsins á Patreksfirði og gerir foreldrum fyrirbura því kleift að snúa fyrr heim en áður var mögulegt.

Marel vogir um allt land
Marel hefur undanfarin ár gefið vogir meðal annars til Móðurástar, MND félagsins, Landspítalans, Heilbrigðisstofnunar Vestmannaeyja, HVEST Ísafirði og nú HVEST á Patreksfirði. 

• Blogga um frétt