Vaktaskipti í brúnni hjá Sjávarklasanum

Berta Daníelsdóttir tekur við starfi framkvæmdastjóra Íslenska sjávarklasans 15. nóvember næstkomandi.

Þetta kemur fram á vefsvæði félagsins.

Þór Sigfússon, stofnandi Sjávarklasans og eigandi, mun því stíga til hliðar sem framkvæmdastjóri félagsins en mun áfram gegna stöðu stjórnarformanns og starfa að nýsköpunarverkefnum.

Berta starfaði áður hjá Marel, sem hún segir leiðandi fyrirtæki í vinnslu á matvælum á heimsvísu, í 18 ár. Þá hefur hún meistaragráðu í stjórnun alþjóðlegra fyrirtækja frá Háskólanum á Akureyri og er meðal stofnenda félagsins Konur í sjávarútvegi.

Haft er eftir Bertu á heimasíðu Sjávarklasans að hún sé afar spennt fyrir starfinu og þeim möguleikum sem Íslenski sjávarklasinn hafi að bjóða viðskiptavinum og samstarfsfyrirtækjum.

„Það liggja mikil tækifæri í framtíðinni og krafturinn í nýsköpuninni hér á landi er heillandi. Þór hefur lagt grunninn að Sjávarklasanum síðastliðin fimm ár og mörg ný fyrirtæki og verkefni hafa litið dagsins ljós sem braggast vel í dag,“ segir Berta Daníelsdóttir.

• Blogga um frétt