Reyna sættir í sjómannadeilunni

Viðsemjendur í sjómannadeilunni eru boðaðir til sáttafundar hjá ríkissáttasemjara á morgun og eru það fyrstu fundahöldin frá því að úrslit lágu fyrir í atkvæðagreiðslu sjómanna og vélstjóra á fiskiskipum um boðun verkfalls.

Ótímabundið verkfall skellur að óbreyttu á að kvöldi 10. nóvember hafi samningar ekki náðst fyrir þann tíma.

Nokkuð er um fundahöld vegna kjarasamningsgerðar í húsnæði ríkissáttasemjara þessa dagana. Í gær var fundað um endurnýjun samninga fyrir rafiðnaðarmenn sem starfa í Borgarleikhúsinu og eftir hádegi komu samninganefndir tónlistarskólakennara og sveitarfélaganna saman til fundar hjá sáttasemjara.