Telja útgerðir hækka verð

Útgerðir í landinu eru orðnir svo fyrirferðarmiklir kaupendur á íslenskum fiskmarkaði að framboð af fiski hefur minnkað þrátt fyrir aukið hlutfall af heildarafla á markað. Niðurstaðan er skortmarkaður á fiski í landinu.

Þetta er mat Ólafs Arnarsonar, talsmanns stjórnar Samtaka fiskframleiðenda og útflytjenda (SFÚ).

Heild­ar­sala á fisk­mörkuðum hér­lend­is í kíló­um talið í ág­úst og sept­em­ber 2016 var sú mesta sem um get­ur á þess­um mánuðum frá stofn­un markaðanna, eins og fram kom í nýlegri frétt 200 mílna. Fyrstu 9 mánuði árs­ins voru þannig seld 92.602 tonn, sem er mesta magn á þessu tíma­bili frá upp­hafi markaðanna. Er það 10.160 tonn­um meira en á sama tíma í fyrra. 

Í frétt frá Reiknistofu fiskmarkaða kemur fram að „þorskur er sem fyrr sú tegund sem selt er mest af eða 39.348 tonn fyrstu 9 mánuðina sem er 4.817 tonnum meira en á sama tímabili 2015 og það mesta frá upphafi markaðanna. Þrátt fyrir þetta eru verðmæti sölunnar lægri en á sama tíma 2015 vegna lækkunar á verði“.

Það er þó mat SFÚ að með tilliti til gengislækkunar á erlendum myntum á sama tímabili hafi verðið hækkað en ekki lækkað. 

Að mati SFÚ má ástæður þessa rekja til þess að útgerðirnar séu orðnar fyrirferðarmeiri á kauphliðinni. „Þó svo að framboð sem hlutfall af heildarafla hafi aukist, samkvæmt upplýsingum frá Reiknistofu fiskmarkaða, hefur framboðið í raun minnkað vegna þess að stórir útgerðaraðilar kaupa svo mikið á markaðnum,“ segir Ólafur Arnarson, talsmaður stjórnar SFÚ.

• Blogga um frétt