„Alvarleg þróun á fiskmörkuðum“

Aukning aflaheimilda hefur ekki skilað sér inn á fiskmarkaði, heldur rennur beint inn í vinnslur kvótafyrirtækjanna.

Þetta kemur fram í athugasemd sem stjórn Samtaka fiskframleiðenda og útflytjenda (SFÚ) sendi frá sér síðdegis í gær. Félagið gerir alvarlegar athugasemdir við innihald og framsetningu þeirra upplýsinga sem settar eru fram í frétt um metsölu á íslenskum fiskmörkuðum, sem Reiknistofa fiskmarkaða birti fyrr í vikunni.

Sífellt minna hlutfall heildarafla skilar sér á markað

Fram kemur í erindinu að hlutfall heildarafla á markað hafi minnkað stórlega frá árinu 2001. Þá hafi hlutfall afla sem seldur er í beinum viðskiptum aldrei verið hærra og var á árinu 2015, eða 70,6%. Um sé að ræða snarpa aukningu frá 2001, þegar hlutfallið var 57,1%.

SFÚ telur fráleitt að birta magntölur um þorsk á markað án þess að gæta að stærðarflokkun, en verðmæti þorsks er afar mismunandi eftir stærðum.

Að mati SFÚ sé birting slíkra talna án stærðarflokkunar sambærileg alhæfingu um efnahagslega stöðu allra launþega í landinu á grundvelli reiknaðs meðaltals launa allra launþega. Slíkt verklag væri fásinna sem engum dytti í hug, að því er fram kemur í tilkynningu  stjórnar SFÚ.

Þá sé ekki síður nauðsynlegt að taka tillit til þess hvort um sé að ræða slægðan afla eða óslægðan.

• Blogga um frétt