Ágæt sátt um strandveiðikerfið

Að mati starfshóps á vegum atvinnuvega- og nýsköpunarráðuneytisins ríkir ágæt sátt um þann grunn sem strandveiðikerfið byggist á, segir í tilkynningu frá ráðuneytinu.

Engu að síður þurfi að taka ákveðin atriði til skoðunar, s.s. hvernig hámarka megi aflaverðmæti, gera refsiákvæði þyngri og bæta öryggismál. Þá er nefnt að herða þurfi ákvæði um eigendur, svo komið verði í veg fyrir að útgerð geti gert út marga báta á strandveiðar enda kerfið ekki hugsað til þess.

Hópurinn telur mikilvægt að meta nú áhrif strandveiðanna, bæði hagræn og samfélagsleg áhrif, þannig að hægt sé að marka upplýsta stefnu til framtíðar, en slíkt var gert skömmu eftir að strandveiðar hófust.