Hönnuðu sjálfvirkar vatnsskurðarvélar í norskan togara

Íslenska fyrirtækið Valka hefur hannað nýja sjálfvirka vatnsskurðarvél í vinnslulínu nýs norsks frystitogara.

„Við erum búnir að smíða þessa vatnsskurðarvél í þetta skip, Ramoen. Þessar vélar hafa verið í landvinnslum í fjögur ár, en þetta er fyrsta vélin sem fer í sjóferð,“ segir Ágúst Sigurðarson markaðsstjóri Völku.

Valka hefur þegar smíðað aðra slíka vél sem fer í Sólberg ÓF-1, sem er nýtt skip Ramma hf. Það skip leggur hins vegar ekki í sína fyrstu sjóferð fyrr en eftir áramótin.

„Ramoen er að fara í sína fyrstu sjóferð í næstu viku og verður þar með fyrsta skipið sem er útbúið þessari nýju tækni og getur því fullunnið svona afurðir um borð,“ segir Ágúst.

Munurinn liggur fyrst og fremst í því að eiga þann möguleika að geta framleitt sjófrystar beinlausar afurðir um borð í skipum, sem eru gríðarlega verðmætar afurðir. 

Nýja vatnsskurðarvélin frá Völku er bylting í fullvinnslu afurða til sjós. Myndin er aðsend.

„Það er mikill spenningur á markaðnum hjá Norðmönnum að fá vörurnar sem þeir munu framleiða með tækninni frá okkur,“ segir Ágúst. 

Sú framför sem næst með þessari nýju tækni er annars vegar sá að geta skorið beingarðinn sjálfvirkt úr og hins vegar að geta skorið flökin niður í bita um borð. „Það hafa menn bara ekki haft aðstöðu eða mannskap til að gera úti á sjó hingað til,“ segir Ágúst Sigurðarson, markaðsstjóri Völku.

• Blogga um frétt