Kjaraviðræðum miðar vel áfram

Vel miðar áfram í kjaraviðræðum sjómanna og Samtaka fyrirtækja í sjávarútvegi. Þetta segir Heiðrún Lind Marteinsdóttir, framkvæmdastjóri SFS, en fundað var í deilunni í dag. Fundað verður aftur á mánudag í húsakynnum ríkissáttasemjara klukkan 13 og segir Heiðrún að báðar hliðar muni vinna smá heimavinnu fyrir fund mánudagsins.

„Það er ekki beint búið að afgreiða nein atriði. Þegar búið er að fara yfir heildarkröfurnar þá er hægt að taka afstöðu til einstakra krafna og þá pakkans í heild sinni, en það er ekki formlega búið að taka afstöðu til neinna krafna á þessu stigi,“ segir Heiðrún um stöðuna. Spurð hvort það sé farið að sjá fyrir endann á verkfallinu kveðst hún vona það, en það sé þó ómögulegt að segja til um það.

„Ég held að menn séu alltaf að reyna að hugsa í lausnum,“ segir Heiðrún spurð út í þennan góða gang viðræðnanna núna, og hvers vegna betur gangi nú en fyrir áramót. „Það liggur fyrir að sjómenn eru búnir að fella samning í tvígang. Það er alltaf verið að reyna að finna samning sem báðir aðilar geta við unað.“

Ekki hefur verið rætt til hversu langs tíma verður samið að sögn Heiðrúnar.

• Blogga um frétt