Sendiherra sæmdur viðurkenningu

Robert C. Barber, sendiherra Bandaríkjanna á Íslandi, var sæmdur sérstakri viðurkenningu Íslenska sjávarklasans fyrir forystu um aukið samstarf Íslands og Bandaríkjanna í haftengdum greinum. Guðlaugur Þór Þórðarson utanríkisráðherra afhenti sendiherranum viðurkenninguna fyrir hönd klasans.

Margt var um manninn og Þór Sigúfsson, stjórnarformaður Sjávarklasans, hélt ræðu fyrir afhendinguna þar sem hann þakkaði sendiherranum mikil og vel unnin störf sín á þessum vettvangi.

Þór Sigfússon hélt tölu fyrir viðstadda þar sem hann þakkaði sendiherranum frábært og óeigingjarnt starf. mbl.is/Þorvaldur B.

„Robert C. Barber hefur í starfi sínu sem sendiherra Bandaríkjanna á Íslandi sýnt mikinn áhuga á því að auka tengsl íslenskra og bandarískra fyrirtækja og frumkvöðla við vinnslu ýmissa hliðarafurða úr fiski og stutt klasann við að byggja tengslanet vítt og breitt um Bandaríkin,“ sagði Þór við þetta tilefni.

„Afrakstur þessa samstarfs er meðal annars opnun Sjávarklasans í Maine-ríki á síðasta ári.“

Robert C. Barber, Georg Lárusson, forstjóri Landhelgisgæslunnar, og Þór Sigfússon voru kampakátir í tilefni dagsins. mbl.is/Þorvaldur B.

• Blogga um frétt