Verkfall sjómanna hefur valdið gríðarlegum samdrætti hjá Fiskmarkaði Suðurnesja. Framkvæmdastjóri segir stöðuna algera hörmung.
„Það er hörmungarstaða í greininni,“ segir Ragnar Hjörtur Kristjánsson, framkvæmdastjóri Fiskmarkaðs Suðurnesja. Þar voru einungis seld 812 tonn af sjávarfangi í janúar á móti 1.800 tonnum á sama tíma í fyrra. Hefur sala því dregist saman um 1.000 tonn.
Þetta má rekja til sjómannaverkfallsins, sem er farið að hafa mikil áhrif víða í greininni og kemur við marga, að því er fram kemur í Víkurfréttum.
Ragnar segir verkfall sjómanna víða hafa áhrif. Auk fiskverkafólks hafi verkfallið meðal annars áhrif á löndunarþjónustur og flutningafyrirtæki. Þó svo starfsfólki í fiskvinnsluhúsum hafi verið sagt upp og það sett á atvinnuleysisbætur geti til að mynda fiskmarkaðirnir ekki gert slíkt. Smábátar hafa verið að landa í Sandgerði og þá þurfi að þjónusta frá markaðnum.
Ragnar Hjörtur Kristjánsson, framkvæmdastjóri Fiskmarkaðs Suðurnesja, segir erfiða stöðu uppi á fiskmarkaði.
Mynd: Víkurfréttir
„Við tökum þá ákvörðun að halda okkar fólki áfram í vinnu þó að það sé ekki mikið fyrir mannskapinn að gera,“ segir Ragnar. Hann segir mikla hættu á að missa menn með meiraprófið í önnur störf verði þeim sagt upp og nefnir Keflavíkurflugvöll sem dæmi, en þar er kallað eftir starfsfólki með aukin ökuréttindi.
Þar sem framboð á fiski er mun minna nú vegna verkfalls sjómanna þá hefur verðið farið hækkandi. Ragnar segir að þau 812 tonn sem Fiskmarkaður Suðurnesja seldi í janúar hafa að mestu farið til fiskvinnslustöðva sem eru að finna ferskan fisk fyrir erlenda viðskiptavini. Það vekur athygli þegar farið er um hafnarsvæðið í Sandgerði að þar er mikið magn fiskikara.
Nú standa um 3.000 kör við hafnarhúsið og ísverksmiðjuna við höfnina. Það er þó eingöngu 3% þeirra fiskikara sem Umbúðamiðlun er með í umferð á landinu öllu.