Loðnan vestur undir Hrollaugseyjum

Loðna hefur gengið hratt suður og vestur með landinu síðustu daga og fremsta gangan var komin á Hrollaugseyjasvæðið vestan Hornafjarðar í morgun.

Þar voru nokkur íslensk uppsjávarveiðiskip, sem fyrst létu úr höfn að afloknu sjómannaverkfalli, að veiðum nú laust fyrir hádegið en önnur voru á leiðinni á miðin. Þetta kemur fram á vef HB Granda.

„Það er loðna komin upp á grunninn við SA-land og eru uppsjávarskipin að veiðum við Hrollaugseyjar. Venus NS og Víkingur AK eru á leiðinni á miðin og skipin verða komin þangað seinni partinn í dag,“ segir Garðar Svavarsson, framkvæmdastjóri uppsjávarsviðs HB Granda, á vefsíðunni.

Hrognafyllingin var fremst í göngunni um 16-17% í lok síðustu viku og er hún nú komin upp í um 20%.

Í morgun var um hálfur annar tugur norskra skipa að loðnuveiðum út af Reyðarfirði og Fáskrúðsfirði en norsku skipin mega ekki veiða sunnan við 64°N og 30´V og aðeins með nót á tímabilinu 20. október til 22. febrúar. Veiðitímabili norsku skipanna, sem eru að verða búin með kvóta sína, er því að ljúka.

• Blogga um frétt