Nýi Kaldbakur á heimleið

Áhöfn flugvélar Landhelgisgæslunnar, TF-SIF, kom í gær auga á nýjasta skip íslenska fiskiskipaflotans, Kaldbak EA-1, á heimleið úr skipasmíðastöð í Istanbúl í Tyrklandi.

Flugvélin hefur undanfarnar vikur verið við landamæravörslu á Miðjarðarhafi á vegum Landamæra- og strandgæslustofnunar Evrópu, Frontex. Í gær kom áhöfnin auga á skipið sem var á siglingu skammt suður af Pelópsskaga, syðsta hluta gríska meginlandsins, að því er kemur fram á vef Landhelgisgæslunnar.

Skipið er rúmlega 60 metra langt og vegur rúm 2.000 brúttótonn.

„Þegar TF-SIF flaug fram hjá Kaldbaki var hann á tólf sjómílna siglingu á leið til Sikileyjar. Ágætisveður var á þessum slóðum, vestan stinningskaldi og fjórtán gráðu hiti. Áhöfn TF-SIF ræddi í gegnum talstöð við Kaldbaksmenn sem voru hinir bröttustu og létu vel af skipinu,“ segir á vefnum. 

• Blogga um frétt