„Loðnan er gullfalleg, stór og fín“

Fyrstu loðnunni á Seyðisfirði var í morgun landað í fiskimjölsverksmiðju Síldarvinnslunnar. 

Börkur NK kom til hafnar í morgun með 2.500 tonn af loðnu og segir Gunnar Sverrisson verksmiðjustjóri það ávallt mikið fagnaðarefni þegar hráefni berst til verksmiðjunnar.

Í tilkynningu Síldarvinnslunnar er haft eftir Gunnari að mjög misjafnt sé hve mikið hráefni berist til verksmiðjunnar á loðnuvertíðum.

„Í fyrra fengum við enga loðnu en árið 2015 fengum við 36.000 tonn. […] Verksmiðjan var ræst strax og löndun hófst í morgun og vonandi verður nóg að gera næstu vikurnar. Hjá okkur var verksmiðjan síðast í gangi í desembermánuði en þá barst kolmunni til vinnslu.“

Hjörvar Hjálmarsson skipstjóri sagði veiðina hafa verið ævintýralega en 1.400 tonn fengust í einu kasti. 

„Hér er mjög mikið af loðnu á ferðinni og hún æðir vestur eftir. Við vorum að nálgast Ingólfshöfðann í síðasta kastinu. Við erum með 2.500 tonn og fengum 1.400 tonn í einu kastinu. Það er stærsta kast sem ég hef upplifað.“

Að því er fram kemur í tilkynningu Síldarvinnslunnar var Beitir NK einnig á landleið í gær og átti að vera kominn til Neskaupstaðar klukkan 2 í nótt. Beitir fékk 2.700 tonn í þremur köstum.

Haft er eftir Tómasi Kárasyni skipstjóra að um tvö 1.000 tonna köst hafi verið að ræða og eitt minna.

„Loðnan er gullfalleg, stór og fín. Við erum með 1.500 tonn kæld og fer sú loðna til manneldisvinnslu.“

• Blogga um frétt