Loðnuskip lönduðu 6.500 tonnum

Norsk loðnuskip lönduðu 6.500 tonnum hjá Síldarvinnslunni í Neskaupstað fyrr í þessum mánuði.

Fyrsti báturinn landaði afla 5. febrúar en sá síðasti 17. þannig að allur þessi afli kom á land á tveimur vikum. Megnið af aflanum fór til manneldisvinnslu en fyrir kom að of mikil áta var í loðnunni. Var henni þá landað í fiskimjölsverksmiðjuna, að því er kemur fram á vefsíðu Síldarvinnslunnar.

„Loðnulandanir norsku bátanna skiptu miklu máli og sköpuðu verkefni fyrir fiskvinnslufyrirtækin á sama tíma og íslenski flotinn lá bundinn við bryggju vegna sjómannaverkfallsins. Vinnslan á þessum tíma var einkar mikilvæg fyrir starfsfólkið sem annars hefði verið aðgerðalaust heima,“ segir á vefsíðunni.

Alls höfðu norsk skip heimild til að veiða 59.500 tonn af loðnu við Ísland á vertíðinni og gengu veiðarnar vel.

• Blogga um frétt