15 fyrirtæki til Boston

Íslandsstofa hefur umsjón með þátttöku 15 íslenskra fyrirtækja í sjávarútvegssýningunni í Boston sem fram fer 19.-21. mars. Á þjóðarbásum Íslands munu fyrirtækin kynna fiskafurðir og tækni og lausnir fyrir sjávarútveg. Samhliða sýningunni fer fram í Boston kynning á íslenskum mat og menningu á vegum „Iceland Naturally“, segir í fréttatilkynningu.

Sjávarútvegssýningin í Boston er stærsta sýning sinnar tegundar í Norður-Ameríku og sækja hana um 22.000 manns. Þátttakendum frá Íslandi hefur fjölgað töluvert síðustu ár auk þess sem fjöldi gesta frá Íslandi sækir sýninguna heim. Þorgerður Katrín Gunnarsdóttir sjávarútvegsráðherra heimsækir sýninguna, hittir íslensku fyrirtækin og kynnir sér viðskiptaumhverfi þeirra, segir enn fremur í tilkynningu.

„Útflutningur sjávarafurða og eldisfisks til Norður-Ameríku hefur farið vaxandi síðustu ár og hlutdeild í heildarútflutningi sjávarafurða aukist nokkuð, í 8%. Þorskur er nærri 50% útflutningsins og hefur útflutningur á ferskum afurðum aukist mikið, bæði til Bandaríkjanna og Kanada. Árið 2016 voru flutt út 21.660 tonn af sjávarafurðum til Bandaríkjanna, 2.100 tonn af eldisafurðum og 343 tonn af lagmeti, samtals að verðmæti 21,5 milljarðar króna,“ segir í tilkynningu.

Fréttatilkynning

• Blogga um frétt