Fer til veiða fyrir mánaðamót

Reiknað er með að Engey RE, nýr togari HB Granda, fari til veiða fyrir mánaðamót. Mikill og flókinn tæknibúnaður hefur verið settur niður í skipinu og síðan er að prófa hann og stilla tæki og hugbúnað.

„Við förum ekki út fyrr en þetta virkar allt fullkomlega,“ segir Vilhjálmur Vilhjálmsson, forstjóri HB Granda. Við komu skipsins var reiknað með að Engey færi í sína fyrstu veiðiferð í lok apríl, að því er fram kemur í Morgunblaðinu í dag.

Engey kom til landsins 25. janúar sl. að lokinni 15 sólarhringa siglingu frá Celiktrans-skipasmíðastöðinni í Istanbúl í Tyrklandi þar sem skipið var smíðað. Þá var byrjað að koma sjálfvirku lestarkerfi ásamt búnaði á vinnsludekk fyrir í skipinu. Búnaðinn hannaði, þróaði og smíðaði fyrirtækið Skaginn 3X á Akranesi og á Ísafirði og er sá fyrsti sinnar tegundar.