Hrefnuveiðin hefur farið illa af stað

Hrefnuveiðar þetta vorið hafa ekki farið vel af stað í Faxaflóa, því enn hefur ekki ein einasta hrefna veiðst.

Til stóð að veiðarnar hæfust um mánaðamótin mars-apríl, en dráttur varð þar á, að sögn Gunnars Bergmanns Jónssonar, framkvæmdastjóra IP-útgerðar ehf. sem gerir út hrefnuveiðibátinn Hrafnreyði og rekur vinnslu í Hafnarfirði. Hófust veiðarnar ekki fyrr en um síðustu mánaðamót.

Hann sagði að annar hrefnuveiðibáturinn, Rokkarinn úr Njarðvík, væri búinn að fara fjóra eða fimm túra í þessum mánuði og einn túr hefði verið farinn á stærri bátnum Hrafnreyði. „Enn sem komið er höfum við ekki fengið neitt, ekki eina einustu hrefnu,“ segir Gunnar í Morgunblaðinu í dag.