Endurnýjar allan ísfisktogaraflotann

Síldarvinnslan hf. hyggst endurnýja allan ísfisktogaraflota sinn. Þetta kom fram á aðalfundi útgerðarinnar sem haldinn var á föstudag. Flotann skipa fjögur skip, Barði NK, Gullver NS, Vestmannaey VE og Bergey VE. Þegar er hafinn undirbúningur á þessu umfangsmikla verkefni.

„Sem liður í þessari endurnýjun var Bjartur NK seldur á síðasta ári til Íran og um þessar mundir er unnið að sölu á Barða NK til Rússlands. Blængur NK, áður Freri RE, hefur verið endurbyggður sem öflugur frystitogari og var hann tekinn í notkun fyrr á þessu ári,“ er haft eftir Gunnþóri B. Ingvasyni framkvæmdastjóra á vef Síldarvinnslunnar.

„Hvað varðar söluna á Barða þá mun myndast eitthvað tómarúm frá sölunni og þar til nýtt skip kemur og verður leitast við að bjóða sjómönnunum sem lenda í slíku millibilsástandi störf á öðrum skipum félagsins eða í landi auk þess sem aðrar lausnir verða skoðaðar,“ segir Gunnþór.

„Endurnýjun skipa eins og hér um ræðir er stór ákvörðun en stefnan er skýr; fyrirtækið vill vera í fremstu röð hvað varðar hagkvæmni í rekstri, meðhöndlun afla og starfsumhverfi sjómanna. Þetta er metnaðarfullt og ögrandi verkefni sem felur í sér stórt framfaraskref.“

• Blogga um frétt