Launþegum í sjávarútvegi fækkaði um 600 á milli ára í aprílmánuði eða um 6%. Nú starfa 8.900 í sjávarútvegi, samkvæmt nýjum gögnum Hagstofu Íslands.
Hallveig Ólafsdóttir, hagfræðingur Samtaka fyrirtækja í sjávarútvegi, segir að rekja megi fækkunina annars vegar til þess að aukin tæknivæðing hafi leitt af sér náttúrulega fækkun starfsfólks en hins vegar séu aðrar skýringar á því að launþegum fækki á milli aprílmánaða.
„Grásleppuaflinn í apríl 2017 var 55% minni en í apríl 2016, sem getur skýrt fækkun í sjó. Eins hefur þurrkverksmiðjum fækkað umtalsvert á sama tímabili. Sjö þurrkverksmiðjur af 21 hafa frá ársbyrjun 2016 hætt starfsemi vegna efnahagsástandsins í Nígeríu. Áætlað er að launþegum hafi fækkað um 100 við það,“ segir hún. Auk þess nefnir hún að sveiflur geti verið í fjölda launþega á milli mánaða vegna þess að útgerðarmynstur hafi breyst og annarra þátta.
Hallveig segir að starfsmönnum í sjávarútvegi hafi fjölgað á árunum 2008 til 2013. Fjölgunina má einkum rekja til aukinnar vinnslu á ferskum fiski. Miðað við gögn frá Hagstofu fjölgaði þeim um 16% á tímabilinu, eða um 1.400, í 10.200. Frá þeim tíma hefur þeim fækkað aftur um 17%, eða um 1.700, í 8.500.
„Fjöldi launþega er nú svipaður og árið 2008. Ég lít svo á að sjávarútvegur veiti 8-10.000 manns atvinnu að staðaldri. Þess vegna er atvinnuástand í sjávarútvegi með eðlilegum hætti um þessar mundir,“ segir hún.
Hallveig segir að með auknum umsvifum í vinnslu á ferskum fiski og sterkara gengi krónu hafi fiskvinnslur gripið til þess að vélvæðast. „Það tekur nokkurn tíma að ná tökum á vélvæðingu,“ segir hún. Aðspurð segir hún að nú gæti verið kominn tími til þess að hagræða á því sviði.
Hún segir líklega verða veitt meira í sumar en í fyrrasumar vegna sjómannaverkfallsins sem stóð í tæpar tíu vikur og lauk í febrúar. Af þeim ástæðum eigi einhverjar útgerðir meiri kvóta en alla jafna um þetta leyti. Það gæti kallað á aukinn mannskap. Enn fremur segir hún að á næsta ári verði botnfiskafli aukinn og það gæti kallað á meiri mannafla hjá útgerðum.
Spurð hvort rekja megi fólksfækkunina í atvinnugreininni til þess að nokkur fjöldi útgerða hafi lagt árar í bát eftir verkfallið, segir hún að samkvæmt þeim gögnum sem SFS búi yfir virðist það ekki vera raunin.