Sjávarútvegsráðherra hefur ákveðið að aflamark í þorski verði aukið í 255.172 tonn á næsta fiskveiðiári, en kvótinn á yfirstandandi ári er 244.000 tonn. Hafrannsóknastofnun hafði lagt til að aflamarkið yrði aukið í 257.572 tonn.
Fram kemur í tilkynningu á vef stjórnarráðsins, að ákvörðun Þorgerðar Katrínar Gunnarsdóttur sjávarútvegsráðherra sé tekin að höfðu samráði við ríkisstjórn, hagsmunaaðila í sjávarútvegi auk stjórnarandstöðu og formanni atvinnuveganefndar Alþingis. Fram kemur að Þorgerður fylgi veiðiráðgjöf Hafrannsóknastofnunar í öllum tegundum.
Þá segir, að í nýlegri skýrslu Hafrannsóknastofnunar komi fram að staða margra fiskistofna sé sterk og því ráðleggi stofnunin aukinn afla í mikilvægum tegundum, s.s. þorski og ýsu. Hins vegar sé ástand íslensku sumargotssíldarinnar slæmt vegna sýkingar og því þurfi að draga verulega úr veiðum.
Enn fremur segir í tilkynningu ráðuneytisins, að sjálfbær nýting og varúðarstefna séu grunnforsendur ráðgjafar Hafrannsóknastofnunar ákvörðunar ráðherra, en fyrir sífellt fleiri af helstu nytjastofnum hafi verið sett nýtingarstefna sem byggi á aflareglu. Við mótun nýtingarstefnu sé haft samráð við hagsmunaaðila, auk þess sem leitað sé eftir áliti og staðfestingu frá Alþjóðahafrannsóknaráðinu. Því megi fullyrða að fiskveiðar við Ísland standist alþjóðleg sjónarmið um sjálfbærni og varúð.
„Í heildina litið eru þetta góð tíðindi sem benda eindregið til þess að stjórn fiskveiða hér við land hafi verið ábyrg á síðustu árum og skili nú þessum árangri þó að ástand síldarinnar sé áhyggjuefni sem þarfnast frekari rannsókna. Við byggjum á sjálfbærri nýtingu vegna þess að okkur ber skylda til þess að skila auðlindinni sterkri til komandi kynslóða. En það er líka mikilvægt í alþjóðlegri markaðssetningu að geta vottað ábyrgar veiðar, því neytendur eru meðvitaðri og gera meiri kröfur en áður. Ég legg einnig áherslu að styrkja hafrannsóknir, ekki síst í ljósi mögulegra breytinga í hafinu umhverfis Ísland, t.d. af völdum loftlagsbreytinga. Við verðum að gera það sem í okkar valdi stendur til þess að bægja þeirri vá frá, en umfram allt þurfum við að skilja hana og möguleg áhrif hennar. Þessar áherslur komu skýrt fram á Hafráðstefnu Sameinuðu þjóðanna í NY á dögunum,“ er haft eftir Þorgerði Katrínu í tilkynningu.
Í meðfylgjandi töflu má sjá ákvörðun ráðherra um heildaraflamark fyrir einstakar tegundir. Þess ber að geta að aflamark fyrir mikilvæga uppsjávarstofna verður ákveðið á haustmánuðum.
Ákvörðun um leyfilegan heildarafla fiskveiðiárið 2017/2018, tonn:
Tegund |
Ákvörðun 2016 |
Ráðgjöf |
Ákvörðun 2017 |
Blálanga |
2.040 |
1.956 |
1.956 |
Djúpkarfi |
12.922 |
11.786 |
11.786 |
Grálúða |
13.536 |
13.536 |
13.536 |
Gullkarfi |
47.205 |
45.205 |
45.450 |
Gulllax |
7.885 |
9.310 |
9.310 |
Humar |
1.300 |
1.150 |
1.150 |
Íslensk sumargotssíld |
63.000 |
38.712 |
38.712 |
Keila |
3.380 |
4.370 |
3.770 |
Langa |
8.143 |
8.598 |
7.598 |
Langlúra |
1.110 |
1.116 |
1.116 |
Litli karfi |
1.500 |
1.500 |
1.500 |
Sandkoli |
500 |
500 |
500 |
Skarkoli |
7.330 |
7.103 |
7.103 |
Skrápflúra |
0 |
0 |
0 |
Skötuselur |
711 |
853 |
853 |
Steinbítur |
8.811 |
8.540 |
8.540 |
Ufsi |
55.000 |
60.237 |
60.237 |
Úthafsrækja |
4.100 |
0 |
0 |
Ýsa |
34.600 |
41.390 |
39.890 |
Þorskur |
244.000 |
257.572 |
255.172 |
Þykkvalúra/Sólkoli |
1.087 |
1.304 |
1.304 |