Páll heitir nú Sindri

Togarinn Páll Pálsson ÍS-102 hefur skipt um lit og nafn í dráttarbraut Stálsmiðjunnar í Reykjavík. Heitir hann nú Sindri VE-60, að því er fram kemur á vef Vinnslustöðvarinnar, en hún keypti skipið af Hraðfrystihúsinu – Gunnvöru í Hnífsdal. 

„Sindra VE er ætlað að fylla skarð Gullbergs VE sem hefur verið selt og verður afhent nýjum eigendum um mánaðamótin júlí/ágúst,“ segir á vef Vinnslustöðvarinnar.

Í Kína er verið að smíða tvo nýja ís­fisk­tog­ara fyr­ir Vinnslu­stöðina og HG, syst­ur­skip­in Breka og nýj­an Pál Páls­son. Dregist hefur þó að ljúka frágangi og afhenda þau.

„Reiknað er nú með að Breki og Páll komi til heimahafna í haust og Sindri VE brúar líka bil sem myndast hjá VSV vegna tafa á heimkomu Breka,“ segir á vefnum. 

Gamli Páll Páls­son, sem nú heitir Sindri, er 45 ára gam­alt skip og var smíðað í Jap­an árið 1972.

„Skipsnafnið Sindri á sér langa og farsæla sögu hjá Vinnslustöðinni og fyrirtækjum henni tengdri. Fiskiðjan gerði út bát með þessu nafni frá sjötta áratugnum til þess áttunda en frá 1977 átti Fiskimjölsverksmiðjan og síðar Vinnslustöðin togara sem Sindri hét og gerði út fram á tíunda áratug síðustu aldar.“

Frétt af mbl.is

Brúar „gamli“ Páll bilið í Eyjum?

• Blogga um frétt