Góð makrílveiði suðaustur af landinu

Góð makrílveiði hefur verið á miðunum suðaustur af landinu. Víkingur AK var væntanlegur til Vopnafjarðar seint í gærkvöldi með rétt tæplega 600 tonn af makríl, segir á vef HB Granda.

Skip frá Vestmannaeyjum og tveir togarar hafa m.a. verið að makrílveiðum í Grindavíkurdjúpi.

„Við vorum að veiðum á Papagrunni, í Lónsdjúpi og Berufjarðarál og fengum strax 170 tonn í fyrsta kasti,“ segir Hjalti Einarsson, skipstjóri á Víkingi, á vef HB Granda. „Síðan tregaðist veiðin og hlutfall síldar jókst. Það er búin að vera kaldafýla á miðunum marga undanfarna daga og það hefur torveldað okkur leitina. Í [gær]morgun fengum við hins vegar 100 tonn af hreinum makríl.“