Skipstjóri sleit rafstreng á veiðum

Héraðssaksóknari hefur ákært karlmann fyrir almannahættubrot og stórfelld eignaspjöll með því að hafa togað með toghlerum og rækjutrolli þvert yfir rafstreng sem lá neðansjávar við innanverðan Arnarfjörð á Vestfjörðum. Maðurinn var skipstjóri á dragnótabáti.

Atvikið átti sér stað í nóvember árið 2014 og sleit hann og skemmdi rafstrenginn með þeim afleiðingum að rafmagn fór af fjarskiptamastri á Laugabólsfjalli. Lá því öll fjarskiptaþjónusta við skip á svæðinu niðri, þ.e. GSM-farsímasamband, Tetra öryggisfjarskiptakerfið og fjarskiptakerfi Vaktstöðvar siglinga, þ.m.t. neyðar- og öryggisfjarskiptakerfi.

Héraðssaksóknari segir að með háttseminni hafi hann raskað öryggi skipa á svæðinu sem sé í alfaraleið og krefst þess að maðurinn verði dæmdur til refsingar og greiðslu alls sakarkostnaðar.

• Blogga um frétt