Bíða með óþreyju eftir nýrri reglugerð

Smábátaeigendur eru nú sagðir bíða með óþreyju eftir reglugerð frá sjávarútvegsráðuneytinu um viðbótarheimildir í makríl. Greint er frá þessu á vef Landssambands smábátaeigenda.

Segir þar að í bráðabirgðaákvæði laga um stjórn fiskveiða sé ritað að úthluta skuli 2.000 tonna makrílveiðiheimildum til smábáta. Þær séu einkum ætlaðar til aðila sem ekki hafi haft tækifæri til að ávinna sér veiðireynslu á viðmiðunarárunum.

„Gegn greiðslu kr. 2,78 á hvert kíló verður hægt að fá makrílheimildir færðar til sín.  Á síðustu vertíð var reglugerðin ekki gefin út fyrr en 6. september og fyrsta úthlutun fór fram 12. september sem var 10 dögum fyrir lok vertíðar.  Nú stóðu vonir til að hafa hana fyrr á ferðinni þannig að auðveldara sé að hefja veiðar strax og makríllinn er kominn í veiðanlegt magn á miðin,“ segir á vef LS.

Bent er á að sambandið hafi lagt áherslu á þetta atriði og ítrekað þá kröfu sína að reglugerðin verði gefin út sem fyrst.

Segir að lokum að samkvæmt upplýsingum frá ráðuneytinu bíði reglugerðin undirritunar ráðherra, sem sé í sumarfríi til mánaðamóta, „sem virðist að vísu ekki stoppa aðrar reglugerðir frá afgreiðslu.“

Uppfært 27. júlí 2017, kl. 10.38:

Fréttin á vef LS hefur verið uppfærð þar sem sambandið fékk rangar upplýsingar um sumarfrí ráðherra.

• Blogga um frétt