Makrílvertíðarstemning í Neskaupstað

Líf og fjör er nú í höfn Neskaupstaðar þar sem veiðiskipin skiptast á að koma og fara, á meðan flutningaskip lesta afurðirnar. Makrílvertíðarstemning er í bænum, að því er fram kemur á vef Síldarvinnslunnar.

Segir þar að sum veiðiskipanna komi með frystar afurðir sem unnar séu um borð. Fara þær í frystigeymslur Síldarvinnslunnar. Önnur skip koma með kældan ferskan makríl til vinnslu í fiskiðjuverinu en þar starfa nú um hundrað manns á þrískiptum vöktum.

Að því loknu tekur Fiskimjölsverksmiðjan á móti afskurði og öllu því sem flokkast frá við manneldisvinnsluna, en það mun vera sáralítill hluti þess afla sem á land kemur.

Börkur NK kom til hafnar í morgun og bíður þess að landa rúmlega 600 tonnum. Afli skipsins fékkst í fjórum stuttum holum ofarlega í Lónsdýpinu.

„Það var töluvert að sjá þarna í gærkvöldi og ég held að bátarnir sem voru þarna hafi verið að fá þokkalegan afla. Það var hins vegar lítið að sjá fyrri partinn í gær. Löndun mun hefjast hjá okkur síðdegis en þá verður lokið við að landa úr Beiti,“ segir Hálfdan Hálfdanarson, skipstjóri á Berki.

Fram kemur einnig á vefnum að Bjarni Ólafsson AK hafi komið með 160 tonn af makríl á föstudag, en sá afli var nýttur til að prófa nýjan búnað í fiskiðjuverinu.

Beitir NK kom þá með 640 tonn í gær og hófst um leið vinnsla af fullum krafti.

Frétt af mbl.is

Makrílvertíðin hafin fyrir alvöru

• Blogga um frétt