Eyðifirðir lokaðir eldisfyrirtækjum

Fiskeldi verður aðeins í þeim fjörðum Fjarðabyggðar sem eru þegar í byggð og atvinnustarfsemi fer þegar fram við og eyðifirðir á borð við Hellisfjörð og Viðfjörð verða lokaðir fyrir fiskeldi og sérstaða ósnortinnar náttúru varðveitt. Þetta er meðal þess sem fram kemur í nýsamþykktri stefnu Fjarðabyggðar í fiskeldi.

Í framtíðarsýninni, sem var samþykkt á fundi bæjarstjórnar Fjarðabyggðar 22. júní sl., segir að góðar aðstæður séu til fiskeldis í Fjarðabyggð og innviðir sterkir en með hliðsjón af þeim áformum um fiskeldi á Austfjörðum var ákveðið að marka stefnu vegna fiskeldis út frá almennum jafnt sem atvinnutengdum hagsmunum.

Segir þar að uppbygging fiskeldis hafi verið í sátt við aðrar atvinnugreinar og í samræmi við væntingar íbúa í sveitarfélaginu í atvinnu- og skipulagsmálum. Segir í framtíðarsýn stefnunnar að verndun ósnortinnar náttúru hafi gengið eftir og víðtæk sátt ríki um lokun eyðifjarða fyrir fiskeldi.

Þá eru stjórnvöld hvött til að vinna með sveitarfélögum í skipulagsmálum haf- og strandsvæða og veita fiskeldissveitarfélögum eðlilega hlutdeild í tekjustofnum þess opinbera af fiskeldi. Einnig verði að gera þeim kleift að verja siglingaleiðir fjarða gegn svæðishelgun eldisfyrirtækja er meðal þess sem kemur fram í stefnumótuninni.

• Blogga um frétt