Sjóstöng og grillaður afli á Trilludögum

Sjóstöng, skemmtisiglingar og lifandi viðburðir eru meðal þess sem verður á boðstólum á Trilludögum sem haldnir verða á Siglufirði um helgina.

Að sögn Lindu Leu Bogadóttur, markaðs- og menningarfulltrúa Fjallabyggðar, tóku Trilludagar við þegar Síldarævintýrinu sem flestir þekkja sleppti.

„Síldarævintýrið var aldrei á forræði sveitarfélagsins en bærinn auglýsti samt sem áður eftir áhugasömum aðilum til þess að taka við en það bar ekki árangur.“

Linda Lea segir að verið sé að prófa nýja hluti á fjölskylduhátíðinni Trilludögum sem sé um margt öðruvísi en aðrar bæjarhátíðir. „Sem dæmi þá verðum við með 10 báta sem þjónusta gesti þeim að kostnaðarlausu. Annars vegar í skemmtisiglingum og hins vegar á sjóstöng.“

Önnur sýn frá hafi

„Það er yndislegt að sigla út fjörðinn og sjá fjöllin og landið frá hafi. Það er allt önnur sýn en þegar keyrt er á landi,“ segir Linda sem bætir við að þegar komið sé að landi með afla sjóferðarinnar bíði flakarar á bryggjunni. Gestum sé boðið að grilla fenginn og meðlæti í boði Kjörbúðarinnar og harmonikkuleikur fari fram á bryggjunni og í sumum bátsferðunum.

Íbúar Siglufjarðar eru um 1.000 manns en á góðum degi má búast við að allt að 2.000 manns sæki Siglufjörð heim að sögn Lindu Leu.

„Í fyrra fóru 400 til 600 manns í siglingar á fjórum bátum en nú höfum við fjölgað þeim í tíu. Tjaldstæðið á Rammalóðinni verður opnað til viðbótar þeim tveimur sem fyrir eru,“ segir hún.

„Trilludagar skilja eftir sig glaða ferðamenn og bæjarbúa. Það má finna tilhlökkun bæjarbúa fyrir hátíðinni í loftinu, segir Linda Lea og bætir við að það kosti ekkert inn á nær alla viðburðina.