Öllum sæbjúgnaveiðisvæðum lokað

Búið er að loka öllum þremur skilgreindum veiðisvæðum sæbjúgna vegna þess að hámarksafli hefur náðst, en lokað var fyrir veiðar í Aðalvík frá og með miðvikudeginum í síðustu viku. Í Faxaflóa var lokað frá og með mánudeginum í þessari viku en áður hafði verið lokað fyrir veiðar á Austfjörðum.

Þorsteinn Hilmarsson, sviðsstjóri þjónustu- og upplýsingasviðs Fiskistofu, segir að þegar hámarkið nálgist tilkynni Fiskistofa sjávarútvegsráðuneytinu um það og það lokar viðkomandi svæði. 

Við sæbjúgnaveiðar er ekki tilgreindur kvóti á bát en gefin eru út níu veiðileyfi. Bátar geta að einhverju marki veitt utan svæða í samráði við Hafrannsóknastofnun. Umsóknarfrestur um leyfi til veiða á sæbjúgum fyrir fiskveiðiárið 2017 til 2018 rennur út 15. ágúst nk. en Fiskistofa auglýsti eftir umsóknum á vef stofnunarinnar fyrr í dag.

• Blogga um frétt