Afli íslenskra skipa var árið 2016 rúm 1.067 þúsund tonn, 252 þúsund tonnum minni en árið 2015. Aflaverðmæti fyrstu sölu var þá rúmir 133 milljarðar króna og dróst saman um 12,1% frá árinu á undan.

Þetta kemur fram á vef Hagstofunnar, en þar segir að þennan samdrátt í aflaverðmæti megi helst rekja til styrkingar krónunnar.

Fram kemur einnig að ríflega 456 þúsund tonn hafi veiðst af botnfiski á síðasta ári, eða 4,7% meira en árið 2015. Þrátt fyrir aukið magn hafi verðmæti botnfisktegunda hins vegar dregist saman á milli ára. Aflaverðmæti úr sjó nam þannig 92,6 milljörðum króna á síðasta ári og dróst saman um 9,9% frá árinu 2015.

„Sem fyrr veiddist mest af uppsjávartegundum, en alls veiddust tæp 575 þúsund tonn árið 2016 sem er samdráttur um 275 þúsund tonn miðað við árið 2015. Munar þar mestu um ríflega 252 þúsund tonna samdrátt í loðnuafla. Verðmæti uppsjávarafla árið 2016 nam rúmum 27,8 milljörðum króna og dróst saman um 19,6% frá árinu 2015 þegar verðmætið nam rúmum 34,6 milljörðum,“ segir á vef Hagstofunnar.

„Tæp 24 þúsund tonn af flatfiski veiddust árið 2016 sem er 1,9% aukning frá fyrra ári. Verðmæti flatfiskafurða nam tæpum 9,1 milljarði króna og dróst saman um 7,9% frá fyrra ári. Af skel- og krabbadýrum veiddust 12,5 þúsund tonn sem er 23,7% meira en árið 2015. Verðmæti skel- og krabbadýraafurða dróst hins vegar saman og nam tæpum 3,5 milljörðum króna samanborið við tæpa 4 milljarða árið 2015.“

Tengdar fréttir

Samdráttur í sjávarútvegi

Hagræðing í skipastól Síldarvinnslunnar

• Uppsagnir þungt högg fyrir samfélagið
• „Þarna eru mörg störf sem eru að tapast“
• 32 sagt upp störfum í Stykkishólmi
• Gagnrýni LS á starfsháttum Hafró vísað á bug

» Fleiri tengdar fréttir

• Blogga um frétt