Meira veitt í júlí í ár en í fyrra

Fiskafli íslenskra skipa var rúmlega 73 þúsund tonn í júlí og jókst veiðin um þrjú prósent frá júlí 2016. Þorskveiði jókst um 22 prósent á milli júlí 2016 og 2017 og var í ár tæp 17 þúsund tonn en botnfiskaflinn nam tæpum 30 þúsund tonnum í heildina í mánuðinum. Það er sex prósentum meira en í sama mánuði í fyrra.

Á vef Hagstofunnar kemur fram að afli uppsjávartegunda hafi numið tæpum 39 þúsund tonnum í júlí sem er litlu minna en í júlí í fyrra. Mest veiddist af makríl, rúm 28 þúsund tonn. Heildarafli á 12 mánaða tímabili frá ágúst 2016 til júlí 2017 var 1.120 þúsund tonn sem er 8 prósent meira en yfir sama tímabil ári fyrr.

Nánari upplýsingar má finna á vef Hagstofunnar.

• Blogga um frétt