Veiða grálúðu miðja vegu til Grænlands

„Við höfum mest verið á höttunum eftir grálúðu og það má segja að leitin að henni hafi gengið vonum framar. Það er vissulega ekki sá kraftur í grálúðuveiðunum sem maður hefði viljað sjá en það fæst þorskur með á slóðinni og það gerir gæfumuninn,“ segir Ævar Jóhannsson skipstjóri frystitogarans Örfirisey RE.

Örfirisey hóf veiðiferðina út af Hampiðjutorginu en þar var dræm grálúðuveiði. „Við höfum síðan fylgt norðurkantinum norður og austur eftir og erum nú staddir djúpt norður af Horni. Héðan eru 40 mílur í miðlínuna milli Íslands og Grænlands og í gær gátum við fylgst með ferðum grænlensks skips sem var á síldveiðum um 70 mílur norður af okkur,“ segir Ævar.

Þar sem skipið er nú satt er helkaldur sjór sem hentar helst fyrir tegundir eins og grálúðu og rækju. „Grálúðan hefur fengist á 230 til 350 faðma dýpi en þar er sjávarhitinn – 0,6 til – 0,8 gráður á selsíus þótt yfirborðshitinn sé vissulega hærri. Þetta er fínasti fiskur. Grálúðan hér er e.t.v. ekki eins stór og menn eiga að venjast á Hampiðjutorginu en stærðin er samt í góðu lagi.“

Að sögn Ævars stefndi frystitogaraflotinn norður í lokað hólf sem opna átti tímabundið kl. 17 síðdegis í gær. „Menn eiga von að fá þarna góða ýsuveiði en það á eftir að koma í ljós hvernig veiðin gengur. Við förum svo væntanlega aftur á Hampiðjutorgið í von um að hitaskil gangi þar yfir svæðið og grálúðan gefi sig til. Við verðum svo með millilöndun í Reykjavík 31. ágúst en veiðiferðinni lýkur formlega 6. september.“

Örfirisey í skipaskrá.

• Blogga um frétt