Bannið kemur verst niður á Íslandi

Viðskiptabann Rússa hefur hlutfallslega komið harðar niður á íslenskum hagsmunum en hagsmunum annarra ríkja. Þar er hlutur sjávarútvegs langstærstur. Rússar ákváðu að banna innflutning á tilteknum matvælum hinn 6. ágúst 2015, m.a. frá Íslandi, og ákváðu í júlí á þessu ári að framlengja bannið til loka árs 2018.

Heiðrún Lind skrifar á vef Viðskiptablaðsins að ekki verði deilt um að Íslendingar eigi að sýna samstöðu með vestrænum ríkjum en hvað sem okkur kunni að finnast um framferði þeirra verði að halda uppi viðræðum við þá sem við kunnum að vera ósammála.

„Umræðan skerpir skilning á afstöðu ólíkra sjónarmiða og markmiðið á að vera að fá botn í deilumál, útkljá þau. Því miður virðist ekkert að frétta af samræðum íslenskra yfirvalda og rússneskra um þetta efni,“ skrifar Heiðrún.

Ákvörðun Rússa um að framlengja viðskiptabannið fylgdi í kjölfar ákvörðunar Evrópusambandsins um að framlengja viðskiptabann á Rússa vegna framferðis þeirra í Úkraínu. „Þátttaka Íslands í viðskiptaþvingunum gegn Rússlandi kom til vegna þrýstings frá Bandaríkjunum og Evrópusambandinu, að sögn fyrrverandi utanríkisráðherra, Gunnars Braga Sveinssonar. Íslendingum er því í raun ekki skylt að taka þátt í þeim,“ skrifar Heiðrún.

„Það er tímafrekt að finna nýja markaði og dýrkeypt að missa markaðsaðgang þegar búið er að koma honum á. Íslensk sjávarútvegsfyrirtæki höfðu komið ár sinni ágætlega fyrir borð í Rússlandi og það væri hentugt fyrir sjávarútveginn að vita hvort íslensk stjórnvöld ætli að gefa þessum mikilvægu, en að því er virðist gleymdu, hagsmunum gaum.“

Lesa má grein Heiðrúnar Lindar hér.

• Blogga um frétt