610 tonna afli í þremur holum

Hoffell, skip Loðnuvinnslunnar, kom til hafnar á sunnudag með 610 tonn af makríl og síld. Páll Sigurjón Rúnarsson, sem var skipstjóri í síðasta túr í fjarveru Bergs Einarssonar, segir túrinn hafa gengið afskaplega vel. Makríllinn hafi verið 480, 500 grömm, stór og fallegur. 

„Við fengum þetta suður af Hvalbak,“ segir Páll Sigurjón í samtali við 200 mílur. Túrinn var rúmur sólarhringur en farið var út tíu á laugardagsmorgun og komið heim um sjö á sunnudagskvöld.

Spurður hvernig sumarið hafi gengið segir Páll þetta hafa gengið afskaplega vel síðan 10. ágúst. „Þetta byrjaði núna í kringum 10. ágúst, bara á svipuðum tíma og í fyrra. Þá kemur þetta í gusum,“ segir Páll sem á von á að tíðin verði góð eitthvað fram í október.

Ljósafell, annað skip Loðnuvinnslunnar, kom til löndunar í gærmorgun með um 62 tonn af blönduðum afla. Allur aflinn verður seldur á fiskmarkaði að þessu sinni þar sem allt er á kafi í makrílvinnslu að því er fram kemur á vef Loðnuvinnslunnar. Skipið siglir til Akureyrar í slipp að löndun lokinni.

• Blogga um frétt