LS kallar eftir meiri línuívilnun

Mikil eining er innan Landssambands smábátaeigenda um að knýja á breytingar um línuívilnun dagróðrabáta. „Línuívilnun ætti ekki einungis að taka til þeirra báta þar sem línu er beitt eða meðhöndluð í landi heldur allra dagróðrabáta undir 30 brt,“ segir á vef Landssambands smábátaeigenda þar sem fjallað er um niðurstöðu stjórnarfundar LS.

Segir þar einnig að línuveiðar séu gríðarlega umhverfisvænar og gott framlag fiskveiðistjórnunar til bættrar umgengni, auk þess að skila hágæðaafla á landi. Á stjórnarfundinum var samþykkt eftirfarandi ályktin:

„Stjórn LS ítrekar fyrri ályktanir um línuívilnun fyrir alla dagróðrabáta minni en 30 brúttótonn. Línuveiðar dagróðrabáta eru afar umhverfisvænar og skila fiski í hæsta gæðaflokki til áframhaldandi meðhöndlunar í landi. Auknar línuveiðar auka þannig gott orðspor íslensks sjávarútvegs í umgengni um náttúruna og ferskleika aflans.“

• Blogga um frétt