Undirrituðu samning um atvinnuuppbyggingu

Laxeldisfyrirtækið Laxar ehf. hyggst auka við starfsemi sína en fyrirtækið á og rekur laxeldisstöðvar á Austurlandi. Fyrirhuguð er bygging fiskvinnslu, fiskkassagerðar og laxabúra vegna fiskvinnslu á Djúpavogi.

Þetta kemur fram í tilkynningu. Þar segir að sú staðsetning sem henti best þessari atvinnuuppbyggingu sé hafnarsvæðið við Innri-Gleðivík á Djúpavogi. Þar sjá Laxar fyrir sér rekstur fiskvinnslu, kassagerðar og laxabúra vegna fiskvinnslunnar.

Af þessu tilefni hafa Laxar ehf. og Djúpavogshreppur gert með sér samning um atvinnuuppbyggingu sem Helgi G. Sigurðsson, framkvæmdastjóri Laxa ehf., og Gauti Jóhannesson, sveitarstjóri Djúpavogshrepps undirrituðu í dag.

Í samningnum felst að Djúpavogshreppur veitir fyrirtækinu forgangsrétt varðandi nýtingu svæðisins til loka september 2019. Tímabilið mun gera Löxum ehf. kleift að ljúka við nákvæma hönnun fyrirhugaðrar starfsemi sem samrýmast skal skipulagsskilmálum svæðisins.

• Blogga um frétt