Stjórn Verkalýðsfélags Vestfirðinga krefst þess að stjórnvöld gefi íbúum Vestfjarða skýr svör og höggvi nú þegar á þá hnúta sem standa atvinnuuppbyggingu í fjórðungnum fyrir þrifum. Þetta kemur fram í ályktun sem félagið hefur sent frá sér.
Segir þar að stjórnin gagnrýni harðlega hugmyndir um að laxeldi við Ísafjarðardjúp verði slegið á frest „eða laxeldi settir þvílíkir afarkostir að ekki verður unnt að hefja raunhæfa uppbyggingu laxeldis við Djúp.“
Fullyrt er að lífsnauðsynlegt sé að skjóta öruggari stoðum undir byggð á Vestfjörðum og tryggja atvinnuöryggi þannig að hægt sé að styrkja grunnþætti atvinnulífs í fjórðungnum. Megin áhersla atvinnuppbyggingar snúi að sjávartengdri atvinnustarfsemi auk nýtingu allra þeirra auðlinda sem Vestfirðir hafi upp á að bjóða. Stjórn félagsins segist þá benda á þann mikla viðsnúning í atvinnulífi og uppbyggingu sem orðið hafi á sunnanverðum Vestfjörðum með tilkomu nýrra atvinnutækifæra.
„Í dag er óhóflegur flutningskostnaður rafmagns ásamt erfiðum rekstrarskilyrðum vegna ótryggrar raforku og skorts á boðlegum heilsárssamgöngum innan Vestfjarða mikil ógn við atvinnuöryggi í fjórðungnum. Alþingi á að boða lagasetningu á Teigsskógshnútinn sem framhald við Dýrafjarðargöng og endurbætur Dynjandisheiðar,“ segir í ályktuninni.
Búsetuskilyrði komist inn í 21. öldina
„Nauðsynlegt er að stórbæta afhendingaröryggi raforku í fjórðungnum með því að ráðast strax í byggingu Hvalárvirkjunar. Slíkt verði í sátt við náttúru og samfélag þó þannig að íbúar svæðisins fái að njóta vafans.
Stjórn Verkalýðsfélags Vestfirðinga minnir á að landsbyggðin ráðstafar um 30-80% af sínum tekjum á höfuðborgarsvæðinu en höfuðborgarsvæðið eingöngu 10-20% af sínum tekjum í hendur lögaðila á landsbyggðinni. Því eru það sjálfsögð mannréttindi að búsetuskilyrði á Vestfjörðum komist inn í tuttugustu og fyrstu öldina. Við viljum að fólkið okkar sé sett í forgang og hér verði sköpuð skilyrði til atvinnuppbyggingar í sátt íbúa og náttúru.
Vestfirðingar eru ekki að biðja um neitt meira en fá að bjarga sér.“