Sækir fisk í soðið í Djúpavík

„Þetta var allt til gamans gert og rétt til þess að fá fisk í soðið. Aflinn fer til heimilis og fjölskyldu og afganginn fá vinir og vandamenn,“ segir Ágúst Guðmundsson. Hann býr í Vestmannaeyjum en er Strandamaður í húð og hár og fer oft á æskuslóðir sínar. Þar var hann fyrir viku síðan og reri á sínu litla bátshorni frá Djúpavík fram á Reykjarfjörðinn.

Hitti ljósmyndari Morgunblaðsins Ágúst þegar hann var að gera að afla dagsins í fjörunni, rétt framan við gömlu síldarverksmiðjuna. Með Ágústi var Gylfi Sigurðsson, smiður í Hafnarfirði, sem er einn fjölmargra sem sækja mikið vestur á Strandir til að afla sér lífsorku í stórbrotnu umhverfinu á þessum slóðum.

„Það togar alltaf í mig að fara norður á Strandir og æ meira eftir því sem ég eldist. Ég fer nú ekki langt, eitthvað út á fjörðinn sem var alveg spegilsléttur og fallegur um helgina. Þar renni ég fyrir fisk. Það er alltaf þorsk að fá, en hins vegar er minna af svartfugli, en hann veiddi ég gjarnan áður og finnst vera herramannsmatur,“ segir Ágúst.

• Blogga um frétt