Ekki samið um makríl

Ekki náðust samningar um stjórnun makrílveiða í Norðaustur-Atlantshafi á fundi strandríkja í London í vikunni. Engir heildarsamningar verða því í gildi um veiðarnar á næsta ári frekar en síðustu ár.

Þrjú strandríkjanna, Evrópusambandið, Noregur og Færeyjar, gerðu með sér samning um þessar veiðar fyrir nokkrum árum. Samkvæmt nýtingaráætlun þeirra er gert ráð fyrir að veiðar aukist ekki um meira en 25% á milli ára og dragist ekki saman um meira en 20%.

Í fyrra komu þessir aðilar sér saman um 1.021 þúsund tonna kvóta á þessu ári og hafa núna komið sér saman um 20% samdrátt í heildarafla, þ.e. að miða heildaraflann við 817 þúsund tonn árið 2018, að því er fram kemur í Morgunblaðinu í dag.