„Mér sýnist fljótt á litið að þessi skýrsla styðji það sem við höfum sagt og vöruðum við fyrir rúmlega ári síðan,“ segir Heiðrún Lind Marteinsdóttir, framkvæmdastjóri Samtaka fyrirtækja í sjávarútvegi, í samtali við mbl.is. 

Tekj­ur í sjáv­ar­út­vegi dróg­ust sam­an um 25 millj­arða króna árið 2016, eða um níu pró­sent. All­ar lík­ur eru á að af­koma fyr­ir­tækja í sjáv­ar­út­vegi versni enn nokkuð á yf­ir­stand­andi rekstr­ar­ári. Þetta kem­ur fram í sam­an­tekt Deloitte á rekstri sjáv­ar­út­vegs­fé­laga, sem gerð var að beiðni at­vinnu­vega- og ný­sköp­un­ar­ráðuneyt­is­ins.

Frétt af mbl.is

Tekjur drógust saman um tugi milljarða

Hún segir að SFS hafi talað um að styrking krónu myndi leiða til þess að verulega drægi saman í sjávarútvegi. „Við bentum meðal annars á að staðan gæti orðið þannig að EBITDA í sjávarútvegi yrði áþekk því sem hún var árin 2008-2009 þegar allt var í járnum í hruninu,“ segir Heiðrún og bætir við þessu til stuðnings að EBITDA í sjávarútvegi árið 2016 hafi verið lægri en hún var árið 2008.

Mestar áhyggjur af minnstu fyrirtækjunum

Hún telur líklegra en ekki að tekjurnar dragist meira saman með sama áframhaldi. „Við erum ekki að sjá verðhækkanir á mörkuðum og það er ólíklegt að við sjáum miklar breytingar á gengi krónu. Laun hafa jafnframt hækkað verulega í landi. Allt þetta leggst á eitt og leiðir til þessarar niðurstöðu.“

Heiðrún segir að áhrifavaldar í þessu samhengi séu tveir; fyrirtækin í sjávarútvegi og stjórnvöld. Fyrirtækin þurfi að takast á við þessar áskoranir og líklega þurfi að hagræða í rekstrinum.

„Sá jákvæði punktur er þó í stöðunni að sjávarútvegur er að öllum líkindum betur í stakk búinn til að takast á við dýpri dali en áður vegna góðs gengis síðustu ára, lækkunar skulda og fjárfestinga í greininni,“ segir Heiðrún en hún bendir þó á að mikill fjöldi aðila starfi í sjávarútvegi og rekstrarleg staða þeirra sé mjög misjöfn.

„Ég hef verulega áhyggjur af stöðunni hjá þeim aðilum sem, þrátt fyrir góð skilyrði liðinna ára, hafa ekki náð að byggja upp nægilega sterka fjárhagslega stöðu til að takast á við erfitt árferði,“ segir Heiðrún.

„Stjórnvöld verða líka að gera það sem þau geta til að tryggja þessa grunnstoð atvinnulífs og að hér sé góður jarðvegur fyrir rekstur þessara fyrirtækja, að hann sé hagfelldur og þau fái þrifist, þannig að ábatinn verði samfélagsins alls. Í því samhengi þurfum við meðal annars að horfa til gjaldtökunnar; að hún sé bæði hófleg og sanngjörn.“

Tengdar fréttir

Samdráttur í sjávarútvegi

Hagræðing í skipastól Síldarvinnslunnar

• Uppsagnir þungt högg fyrir samfélagið
• „Þarna eru mörg störf sem eru að tapast“
• 32 sagt upp störfum í Stykkishólmi
• Gagnrýni LS á starfsháttum Hafró vísað á bug

» Fleiri tengdar fréttir

• Blogga um frétt