Lönduðu 1.200 tonnum af síld

„Það virtist vera síld á stóru svæði þegar við komum þarna og í gær mátti sjá stóra síldarflekki sem gáfu vel. Síldin er feit og flott og afar góð í alla staði,“ segir Hjörvar Hjálmarsson, skipstjóri á Berki NK, sem kom til Neskaupstaðar í morgun með 1.200 tonn af síld.

Haft er eftir Hjörvari á vef Síldarvinnslunnar að veiðiferðin hafi gengið vel.

„Við fengum aflann í fimm holum austur undir miðlínu á milli Færeyja og Íslands, um 140 mílur austur af Norðfirði. Aflinn var 200 tonn í fyrstu þremur holunum, 400 tonn í því fjórða og 200 tonn í því fimmta en þá var einungis dregið í 25 mínútur,“ segir Hjörvar.

Af öðrum skipum Síldarvinnslunnar er það að frétta að Beitir NK er á síldarmiðunum og Bjarni Ólafsson AK er að kolmunnaveiðum, en skipið hóf veiðar út af Seyðisfjarðardýpi í morgun.

• Blogga um frétt