Starfi þverpólitískrar nefndar um framtíðarfyrirkomulag gjaldtöku fyrir afnot af fiskveiðiauðlindinni hefur verið slitið. Þetta kemur fram í tilkynningu frá atvinnuvega- og nýsköpunarráðuneytinu og segir þar að nefndinni hafi verið slitið vegna þingrofs og komandi kosninga.

Með tilkynningunni fylgir greinargerð formanns nefndarinnar, Þorsteins Pálssonar, um stöðu mála í nefndinni við starfsslitin en alls hélt hún níu formlega fundi frá 19. maí til 6. september.

Í greinargerðinni segist Þorsteinn hafa ítrekað þá skoðun sína, á síðasta fundi nefndarinnar, að mikilvæg forsenda fyrir áframhaldandi leit að lausn væri samstaða um að gjaldtaka skyldi miðast við tímabundin afnot auðlindarinnar.

„Allir flokkar nema Sjálfstæðisflokkurinn“

„Á það gátu allir flokkar fallist nema Sjálfstæðisflokkurinn sem ekki var tilbúinn til þess að svo komnu máli,“ segir hann og bætir við að hann telji gjald fyrir tímabundinn afnotarétt forsendu fyrir því að ná megi tveimur afar mikilvægum markmiðum í löggjöf um þessu efni.

„Annars vegar að lagareglurnar endurspegli með alveg ótvíræðum hætti sameign þjóðarinnar. Hins vegar að þær megi stuðla að sem mestri þjóðhagslegri hagkvæmni veiðanna. Í þessu ljósi var nauðsynlegt að mínu áliti að kanna mögulega samstöðu um þetta grundvallaratriði áður en reyndi á samkomulagsvilja um aðferð við gjaldtöku og umfang hennar. Um þau atriði var augljóslega meira svigrúm til samkomulags. Það á einnig við um tímalengd nýtingarréttar.“

Í beinu framhaldi af ofangreindum fundi hafi hann því gert Þorgerði Katrínu Gunnarsdóttur sjávarútvegsráðherra munnlega grein fyrir því að hann teldi tilgangslítið að halda tilraunum til samkomulags um önnur álitaefni áfram, „að óbreyttri afstöðu forystuflokks ríkisstjórnarinnar til tímabundinna réttinda. Þetta mat mitt er óbreytt.“

Tengdar fréttir

Veiðigjöld

Veiðigjöld tóku breytingum

• Greiddu rúma 10 milljarða í veiðigjöld
• 7,9 milljarða í veiðigjöld á 9 mánuðum
• Auðlindagjöld skili 12,2 milljörðum króna
• Mestu veiðigjöld síðustu fimm ár

» Fleiri tengdar fréttir

• 1 blogg um fréttina

Bloggað um fréttina

• Kristbjörn Árnason: Alltaf kemur betur og betur í ljós, að Sjálfstæðisflokkurinn á …