Nýr sjávarklasi í Norður-Noregi

Í síðustu viku undirrituðu Þór Sigfússon, stofnandi og stjórnarformaður Íslenska sjávarklasans, og Ronny Isaksen, framkvæmdastjóri Linken Næringshage AS í Bátsfirði Noregi yfirlýsingu um samstarf við stofnun nýs sjávarklasa í Bátsfirði í Norður-Noregi. Sjávarklasinn yrði sá fjórði sem komið verður á fót að fyrirmynd Íslenska sjávarklasans en ferlið er enn á undirbúningsstigi. Þetta kemur fram á vefsíðu Sjávarklasans.

Frétt mbl.is Útrás til Seattle fer vel af stað

„Undirbúningur samstarfsins hófst síðastliðinn vetur þegar við fengum fulltrúa frá Bátsfirði í heimsókn til okkar. Við finnum fyrir miklum vilja þar til að koma á fót sjávarklasa sambærilegum þeim sem við starfrækjum hér en þetta er enn í undirbúningi. Okkur fannst sérstaklega ánægjulegt að sjá hversu margir forystumenn fyrirtækjanna þar eru tilbúnir í þetta verkefni og eru spenntir fyrir samstarfi við íslensku fyrirtækin“ segir Þór Sigfússon, stofnandi og stjórnarformaður Íslenska sjávarklasans. 

Þór Sigfússon og Ronny Isaksen, framkvæmdarstjóri Linken Næringshage AS. Íslenski Sjávarklasinn

Bátsfjörður er í Finnmörku og búa tæplega 2.300 manns í bænum. Aðalatvinnuvegur er fiskveiðar og landa þeir 90 þúsund tonnum af hvítfiski árlega. Í Bátsfirði eru nokkur af stærstu útgerðarfyrirtækjum Noregs með aðstöðu og eru þau spennt fyrir samstarfi um sjávarklasa á þessum slóðum.

Frétt af mbl.is Sjáv­ar­klasi að ís­lenskri fyr­ir­mynd vest­an­hafs

• Blogga um frétt