Arnar nýr formaður

Arnar Atlason, framkvæmdastjóri Tor Fiskvinnslu í Hafnarfirði, var kjörinn formaður Samtaka fiskframleiðenda og útflytjenda (SFÚ) á aðalfundi samtakanna sem haldinn var á Bryggjunni brugghúsi á laugardaginn.

Hann tekur við formennskunni af Jóni Steini Elíassyni, sem hefur stýrt samtökunum síðastliðin níu ár. Arnar var einn í framboði og var fagnað með lófataki.

Formennskan leggst vel í Arnar en hann segir samtökin vera nauðsynleg í þá flóru sem íslenskur sjávarútvegur er. Aðspurður hvort hann hyggist leggja áherslu á sérstök málefni segir hann að hans áherslur verði á svipuðum nótum og verið hefur hjá SFÚ.

„Þar að auki tel ég að það þurfi að skerpa enn frekar á að ráðamenn átti sig á því að þessi lóðrétta samþætting sé ekki endilega það eina rétta og ef við ætlum að reyna að auka verðmæti sjávarafurða þá þurfum við að reyna með öllu móti að skilja frekar á milli veiða og vinnslu líkt og gert hefur verið í orkugeiranum og er gert í flestum þróuðum löndum í kringum okkur.“